ABŞ-da mühakimə olunan keçmiş Venesuela prezidenti Nicolás Maduro və həyat yoldaşı Cilia Flores barəsində irəli sürülən ittihamların əhatə dairəsi genişlənib.
Prokurorlar Maduro və Floresi Venesuelada siyasi müxaliflərə və bəzi ABŞ vətəndaşlarına qarşı işgəncə və pis rəftar hallarına bağlı olmaqda ittiham ediblər.
Məhkəməyə yeni ittiham təqdim edildi
Məhkəməyə təqdim olunan yeni ittihamnamədə Maduro və Floresin işgəncə vermək məqsədilə sui-qəsd hazırladıqları iddia olunur. Prokurorluq bu əməllərin Maduro hakimiyyəti dövründə dövlətin təhlükəsizlik strukturları vasitəsilə həyata keçirilən bəzi tədbirlərlə əlaqəli olduğunu bildirib.
Maduro daha əvvəl ABŞ-da narkotik qaçaqmalçılığı ilə bağlı ittihamlarla üzləşmişdi. Yeni ittihamlarla isə onun və həyat yoldaşının hakimiyyəti dövründə saxlanılan şəxslərə qarşı münasibəti də məhkəmənin gündəminə gətirilib.
İki hadisə xüsusi qeyd olunub
İttihamnamədə 2013 və 2022-ci illərdə baş verdiyi iddia olunan iki hadisəyə diqqət çəkilir.
2013-cü ildə dövlət çevrilişinə hazırlaşdığından şübhələnilən venesuelalı hərbçinin saxlanıldığı müddətdə pis rəftara məruz qaldığı bildirilir.
2022-ci ildə isə saxlanılan ABŞ vətəndaşına qarşı oxşar şəkildə işgəncə tətbiq edildiyi iddia olunur.
Qeyd edək ki, ittihamlar hələ məhkəmə tərəfindən təsdiqlənməyib və Maduro ilə Floresin təqsiri barədə yekun qərar verilməyib.
Şəhla Sabirli
İNFOAZ.MEDİA
