ABŞ prezidenti Donald Tramp İrana xəbərdarlıq edərək bildirib ki, razılığa gəlmək üçün vaxt sürətlə azalır. O, Truth Social hesabında “nəhəng bir armadanın” İrana doğru irəlilədiyini yazıb və ABŞ donanmasının lazım gələrsə, güc tətbiq etməyə hazır olduğunu vurğulayıb.
İNFOAZ.MEDİA xəbər verir ki, Tramp qeyd edib ki, mümkün hücum ötən ilin iyununda İranın üç nüvə obyektinə endirilən zərbələrdən daha genişmiqyaslı olacaq. O, ABŞ-ın Venesuelada həyata keçirdiyi son əməliyyatı misal çəkərək, donanmanın “sürət və qətiyyətlə” hərəkət edə biləcəyini bildirib.
ABŞ prezidenti İranı nüvə proqramını istənilən razılaşmanın bir hissəsi kimi məhdudlaşdırmağa çağırıb və “nüvə silahlarına yox” prinsipi əsasında danışıqlara başlamağa dəvət edib. Vaşinqton İranın uranın zənginləşdirilməsini dayandırmasını tələb etsə də, Tehran bunu qəbul etmir və nüvə proqramının dinc məqsədlər daşıdığını bildirir.
Son həftələr ABŞ-ın bölgəyə əlavə hərbi qüvvələr yerləşdirməsi Körfəz ölkələrində narahatlığı artırıb. Trampın açıqlamalarından sonra neft qiymətləri cüzi yüksəlib. ABŞ və İran arasında mümkün eskalasiya regional münaqişə risklərini gücləndirir.
Rauf
