ABŞ Prezidenti Donald Trampın fəaliyyətini bəyənən amerikalıların sayı rekord aşağı səviyyəyə enib. Bu vəziyyət noyabrda keçiriləcək aralıq seçkiləri ərəfəsində Respublikaçılar Partiyasının mövqelərini çətinləşdirir.
İNFOAZ.MEDİA xəbər verir ki, bu barədə “Clash Report” “The Washington Post”, ABC News və Ipsos tərəfindən keçirilən sorğunun nəticələrinə istinadən məlumat yayıb.
Sorğunun nəticələrinə görə, amerikalıların 33 faizi Trampın fəaliyyətini dəstəkləyir, 66 faizi isə onun fəaliyyətindən narazıdır. Respondentlərin 52 faizi prezidentin fəaliyyətini qəti şəkildə bəyənmədiyini bildirib. Trampın reytinqi iyul ayı ilə müqayisədə 4 faiz bəndi, ötən ilin eyni dövrü ilə müqayisədə isə 8 faiz bəndi azalıb.
Sorğuda iştirak edən qeydə alınmış seçicilər arasında Konqres seçkilərində Demokratlar Partiyası Respublikaçılardan 8 faiz bəndi öndədir. İyul ayında bu fərq 3 faiz bəndi təşkil edirdi.
Trampın iqtisadi siyasətinə dəstək daha aşağı səviyyədədir. Respondentlərin cəmi 28 faizi prezidentin iqtisadiyyatın idarə olunmasını müsbət qiymətləndirib. İnflyasiya və yaşayış xərcləri ilə bağlı siyasətə isə sorğu iştirakçılarının təxminən dörddə üçü mənfi yanaşıb.
İranda hərbi əməliyyatlarla bağlı mövqe də prezidentə təzyiq yaradan amillərdən biri kimi göstərilir. Sorğu iştirakçılarının 65 faizi İrana qarşı hərbi əməliyyatların səhv qərar olduğunu düşünür.
ABŞ-da aralıq seçkilər 3 noyabr 2026-cı ildə keçiriləcək. Seçkilərdə Konqresin Nümayəndələr Palatasına və Senatına nəzarət uğrunda mübarizə aparılacaq. Sorğunun nəticələri Demokratların mövqelərinin gücləndiyini göstərsə də, seçkilərin yekun nəticəsini əvvəlcədən müəyyən etmir.
Rauf
