Kanadanın Baş naziri Mark Karni bildirib ki, onilliklər ərzində ölkənin müdafiə və xarici siyasətini formalaşdıran əsas yanaşmalar artıq köklü şəkildə dəyişib.
İNFOAZ.MEDİA xəbər verir ki, Karni qeyd edib ki, dünya yeni geosiyasi reallıqlarla üz-üzədir və təhlükələr getdikcə artır.
“Tarix yenidən bütün gücü ilə qayıdıb. Arktikadakı sərhəd pozuntularından tutmuş kiberməkanda həyata keçirilən hücumlara qədər çoxsaylı və artan təhdidlərlə qarşı-qarşıyayıq”, – deyə o bildirib.
Baş nazir vurğulayıb ki, müharibələrin xarakteri də sürətlə dəyişir. Onun sözlərinə görə, pilotsuz uçuş aparatlarının, avtonom sistemlərin və hipersəs raketlərinin geniş yayılması müasir döyüş meydanını tamamilə fərqli mərhələyə keçirib.
Karni əlavə edib ki, avtoritar rejimlər getdikcə daha iddialı siyasət yürüdür, ənənəvi müttəfiqlik münasibətlərində məsuliyyət bölgüsü dəyişir və Kanada kimi orta güclər oxşar mövqedə olan tərəfdaşlarla əməkdaşlığı gücləndirməklə daha böyük strateji müstəqillik əldə etməyə çalışırlar.
Baş nazir sonda vurğulayıb ki, Kanada həm iqlim dəyişikliyinin yaratdığı çağırışlara, həm də formalaşan yeni geosiyasi mühitə uyğun addımlar atmalıdır.
Jalə
