Cənubi Koreyanın məşhur turizm məkanı Jeju adasında polis əməkdaşının itkin şəxslərlə bağlı işləri qanunsuz şəkildə bağlaması böyük qalmaqala səbəb olub.
İNFOAZ.MEDIA xəbər verir ki, araşdırma zamanı polis serjantının iki itkin şəxsin işini lazımi yoxlama aparmadan bağladığı və onların ailələrinə yaxınlarının təhlükəsiz olduğunu bildirdiyi üzə çıxıb. Hər iki şəxsin meyiti sonradan aşkarlanıb.
Məlumata görə, serjant Bu mart 2025-ci ildən 2026-cı ilin iyulunadək ümumilikdə 298 itkin şəxsin işi ilə məşğul olub. Polis həmin dosyelərin hamısını yenidən nəzərdən keçirmək üçün xüsusi istintaq qrupu yaradıb.
İşlərdən biri may ayında itkin düşən 37 yaşlı Canq Mi-ranla bağlı olub. Polis əməkdaşı onunla əlaqə saxladığını və təhlükəsiz olduğunu bildirərək işi bağlayıb, lakin sonradan qadının meyiti 104 gün sonra tapılıb.
Digər hadisədə isə 60 yaşlarında olan kişinin ailəsinə onun sağ olduğu və ailəsi ilə əlaqə saxlamaq istəmədiyi bildirilib. Axtarış yalnız iş yenidən açıldıqdan sonra bərpa edilib və kişinin meyiti axtarışın başlanmasından bir gün sonra aşkarlanıb.
Polis əməkdaşı vəzifədən kənarlaşdırılıb və saxlanılıb. Jeju əyalət polisinin rəhbəri Ko Pyeonq-gi isə hadisəyə görə ictimaiyyət qarşısında üzr istəyərək bütün itkin şəxslərlə bağlı işlərin hərtərəfli yoxlanılacağını açıqlayıb.
Qalmaqal Cənubi Koreyada polis sistemində itkin şəxslərlə bağlı prosedurların effektivliyinə dair ciddi suallar yaradıb. Ölkə prezidenti Li Ce Myonq da polisə nəzarətin gücləndirilməsi və sistemdə islahatların aparılması barədə göstəriş verib.
Şəhla Sabirli
İNFOAZ.MEDİA
