Ernesto Soberon Guzman bildirib ki, Kuba ABŞ-ı razı salmaq üçün hökumətini dəyişmək niyyətində deyil.
İNFOAZ.MEDİA xəbər verir ki, bloomberg-in yaydığı məlumata görə, o vurğulayıb ki, ölkə rəhbərliyində dəyişiklik tələbləri ümumiyyətlə müzakirə mövzusu deyil.
Diplomat qeyd edib ki, hakimiyyət dəyişikliyi və ya “ABŞ-a uyğun rejim” qurulması ilə bağlı istəklər istənilən dialoqdan kənardır.
O əlavə edib ki, mümkün danışıqlar yalnız qarşılıqlı hörmət prinsipləri əsasında aparıla bilər və Havana hər cür təzyiqə sərt cavab verməyə hazırdır.
Qeyd edək ki, bir müddət əvvəl Kuba prezidenti Migel Dias-Kanel bildirib ki, Havana istənilən xarici müdaxilə cəhdinə qarşı qəti müqavimət göstərməyə hazırdır. O, ABŞ-ın Kubanın konstitusiya quruluşunu devirmək təhdidlərinə cavab verib.
Diaz-Kanel qeyd edib ki, ən pis ssenaridə belə, ölkə xarici təcavüzə qarşı geri çəkilməyəcək. Onun sözlərinə görə, ABŞ uzun illərdir tətbiq etdiyi blokada və təzyiqlərlə yaranan iqtisadi çətinliklərdən bəhanə kimi istifadə edir və tez-tez Kubanın qanuni hakimiyyətini devirməklə hədələyir.
Kuba lideri həmçinin vurğulayıb ki, Vaşinqtonun məqsədi ölkənin resurslarını və iqtisadiyyatını nəzarətə götürməkdir və bu səbəbdən kubalılara qarşı iqtisadi təzyiq siyasəti aparılır.
Xatırladaq ki, Donald Tramp administrasiyası yanvarda Kubanı “ifrat təhlükə” elan edərək yanacaq tədarükünə məhdudiyyət tətbiq edib. Havana isə bu ittihamları rədd edir və siyasətinin ABŞ üçün təhlükə yaratmadığını bildirir.
Rauf
