Beynəlxalq Cinayət Məhkəməsinin prezidenti Tomoko Akane məhkəmənin hər hansı ölkə və ya hökumətə qarşı düşmən mövqedə olmadığını bildirib.
İNFOAZ.MEDİA xəbər verir ki, Akane ABŞ-ın ona qarşı sanksiyalarından sonra keçirilən videokonfransda məhkəmənin fəaliyyətinin siyasi xarakter daşımadığını vurğulayıb. ABŞ bu yaxınlarda Akane və BCM-nin yüksək vəzifəli əməkdaşlarından birinə qarşı sanksiyalar tətbiq edib.
“Biz hər hansı konkret ölkəyə və ya hökumətə qarşı düşmən deyilik. Biz sadəcə dünyada ən ağır cinayətləri törətmiş şəxsləri araşdırmaq və mühakimə etmək səlahiyyəti verilmiş məhkəməyik”, – deyə Akane bildirib.
O əlavə edib ki, BCM-nin hər hansı hökumətin və ya ölkənin düşməni kimi fəaliyyət göstərməsi barədə təsəvvür tamamilə yanlışdır.
“İstəyirəm ki, insanlar bunu aydın şəkildə başa düşsünlər: biz qətiyyən hər hansı hökumətə və ya ölkəyə qarşı düşmən kimi fəaliyyət göstərmirik”, – deyə Akane vurğulayıb.
BCM ABŞ-ın tətbiq etdiyi yeni sanksiyaları məhkəmənin müstəqilliyinə təhdid kimi qiymətləndirib.
Jalə
